廖啟智在1979年無綫第8期藝員訓練班畢業後就投身演藝界，跟太太陳敏兒、梁潔華、艾威、湯鎮業等是同班同學。1979年他與陳敏兒開始拍拖，陳敏兒外形標致，在當時好快就擔正女主角，另她又有做《體育世界》及其他大騷主持，受到TVB力捧，是當紅花旦之一。那時廖啟智仍然是配角，發展有差距，但有指陳敏兒沒有介意過，想跟他廝守一生。
攞金像獎追憶細仔
婚後，二人共添3子，一家5口樂也融融，陳敏兒全面退出照顧家庭。但2003年3歲的細仔廖文諾證實患上血癌，病情每況愈下，曾被送進傳染隔離病房十幾日，兩公婆不眠不休等待消息。3年化療，細仔病發反覆，當時廖啟智扛起照顧全家責任之餘，又再兼顧工作，直至2006年細仔離世。陳敏兒因而一度患上抑鬱症。
細仔去世三年後，2009年廖啟智時隔十六年再獲金像獎最佳男配角，上台發表感言時，他說：「我好感謝我太太和我三個仔對我的愛，令到我可以好輕鬆、好從容面對我的工作，多謝你啲。」隨後他仰頭望向高處，「阿仔呀，個獎16年過去已經爛咗了，今次承你貴言我又拿到一個新的。諾諾呀，雖然今日你唔係我身邊，但我知道呢個獎我同你都有份。」
後來大仔被爆易服，更公開表示想做女人，兩夫婦都能平淡接受，一家人回到昔日的平靜，陳敏兒亦慢慢走出陰霾，親撰文章講述細仔離世的經過和心情：「奮鬥呢3年曾經令我好封閉，但亦令我明白生命係好脆弱……人生在世，仲有咩比家人更重要？把握同佢哋相處嘅時光先最重要，我要將正能量傳遞給大家，呢場逆境反而可以將家庭提升。」
大公報記者 陳惠芳、徐小惠
